شراب – ام الخبائث : مفتی محمد ثناء الہدیٰ قاسمی

121 1 minute read

شراب ام الخبائث ہے، یہ سارے گناہوں کی جڑ ہے ، انسان اس کے زیر اثر آنے کے بعد کچھ بھی کر گذرتا ہے

بہار میں شراب لانے لے جانے، پینے پلانے پر پابندی ہے ، اس کے با وجود شراب اور منشیات کے اسمگلر اس سے باز نہیں آ رہے ہیں، ابھی حال ہی میںکئی مقامات پر زہریلی شراب پینے سے لوگ موت کے منہہ میں چلے گیے، سرکار کی جانب سے انتہائی سختی کے باوجود شراب کی سپلائی بہار میں جاری ہے، اور پولیس کا عملہ اس پر قابو نہیں پا رہا ہے۔ شراب ام الخبائث ہے، یہ سارے گناہوں کی جڑ ہے ، انسان اس کے زیر اثر آنے کے بعد کچھ بھی کر گذرتا ہے ، حال ہی میں پانی پت کے گاؤں چبلا داس سے ایک خبر آئی تھی کہ شراب کے لیے پیسے نہ دینے کی وجہ سے ایک لڑکا نے اپنے باپ کوپتھر مار مار کر ہلاک کر دیا، باپ کا قصور صرف یہ تھا کہ اس نے شراب کے لیے پیسہ نہ دینے کے ساتھ اپنے بیٹے امیت کو جس کی عمر صرف بتیس سال تھی ، کچھ نصیحت کر دیا تھا اور ایک طمانچہ بھی لگا دیا تھا ، بیٹا انتظار میں تھا ، ۲۴؍ گھنٹے کے بعد جب راج کپور اسٹیشن کی طرف ٹہلنے نکلا تو بیٹے نے اس پر پیچھے سے وار کر دیا اور اس وقت تک پتھر مارتا رہا جب تک اس کی موت نہیں ہو گئی۔

شراب کی وجہ سے جرم کا کوئی یہ پہلا واقعہ نہیں ہے ، اخبار میں اس قسم کی خبریں روزانہ آتی رہتی ہیں، ضرورت اس بات کی ہے کہ شراب اور دیگر منشیات سے نوجوانوں کو بچانے کے لیے بیداری مہم چلائی جائے اور اس کے مضر اثرات سے لوگوں کو آگاہ کیاجائے اور بتایا جائے کہ شراب نوشی اور دیگر منشیات کا استعمال انسانی صحت اور صالح سماج کے لیے انتہائی نقصان دہ ہے، تبھی تو اللہ تعالیٰ نے اسے ناپاک اور شیطانی عمل قرار دیا ہے ، اگر ہم اس شیطانی عمل سے سماج کو بچا سکے تویہ اس دور کا بڑا اور قابل قدر کام ہوگا۔