بہار میں ڈینگو کا قہر ، پٹنہ کی حالت خراب : جائزہ لینے پہنچی مرکزی ٹیم، 24 گھنٹوں میں 502 کیسز

279 2 minutes read

بہار میں ڈینگو کا پھیلاؤ بڑھتا جا رہا ہے۔ راجدھانی پٹنہ کی حالت سب سے خراب ہے جہاں ڈینگو متاثرین کی تعداد نے پچھلے تمام ریکارڈ توڑ دیئے۔ جمعہ کو پٹنہ کے اسپتالوں میں ڈینگی ٹیسٹ میں 502 مریض پائے گئے ہیں۔ ان میں سے 261 پٹنہ کے ہیں۔ اس کے ساتھ ہی پٹنہ میں ڈینگو کے مریضوں کی تعداد بڑھ کر 4390 ہو گئی ہے۔ مرکزی ٹیم نے پٹنہ کے اسپتالوں کا معائنہ کیا اور افسران کے ساتھ میٹنگ کی۔

پٹنہ کے پی ایم سی ایچ میں 13، این ایم سی ایچ میں 77، پٹنہ ایمس میں 44 اور آئی جی آئی ایم ایس میں 35 مریض داخل ہیں۔ عظیم آباد اب بھی ڈینگو سے سب سے زیادہ متاثرہ علاقہ ہے۔ جمعہ کو عظیم آباد میں 58، وانکی پور میں 55، کنکر باغ میں 14، پٹنہ سٹی میں 9، پاٹلی پترا میں 20، نوتن راجدھانی زون میں 13 مریض پائے گئے ہیں۔

مرکزی ٹیم نے PMCH اور NMCH کا جائزہ لیا۔

ہفتہ کو ڈی ایم پٹنہ نے ڈینگو کی خوفناک صورتحال کے بارے میں مرکزی ٹیم کے ساتھ میٹنگ کی۔ ٹیم نے پہلے اسپتالوں کا دورہ کیا، پھر کنٹرول کے حوالے سے ڈی ایم کے ساتھ بات چیت کی۔

دوسری جانب جمعہ کو مرکزی ٹیم نے پی ایم سی ایچ اور این ایم سی ایچ کا جائیزہ لیا۔ پی ایم سی ایچ کے ٹاٹا وارڈ میں واقع ڈینگی وارڈ، لیب اور بلڈ بینک کا دورہ کیا۔ یہاں 125 بستروں کا ڈینگو وارڈ بنایا گیا ہے۔

ٹیم نے داخل مریضوں اور ان کے اہل خانہ سے بات چیت کی۔ ہسپتال انتظامیہ نے دعویٰ کیا کہ ٹیم معائنہ کے بعد مطمئن نظر آئی۔ ٹیم نے این ایم سی ایچ کی ایم سی ایچ بلڈنگ میں بنائے گئے ڈینگی وارڈ کا بھی جائزہ لیا اور مریضوں اور ان کے اہل خانہ سے پوچھ گچھ کی۔

مریضوں کی تعداد بڑھنے سے ہسپتالوں میں کم پڑنے لگے بستر

ریاست کے کئی سرکاری اسپتالوں میں ڈینگو وارڈوں میں بستروں کی کمی ہے۔ 4 رکنی مرکزی ٹیم نے ڈینگی کی صورتحال کا جائزہ لینے کے لیے راجگیر اور بہار شریف کے کچھ علاقوں کا بھی دورہ کیا جہاں بڑی تعداد میں ڈینگی کے کیسز رپورٹ ہوئے ہیں۔