دربھنگہ کے کوشیشوراستھان میں نوجوانوں کو ماری گولی، ڈی ایم سی ایچ ریفر
دربھنگہ ( محمد رفیع ساگر / قومی ترجمان بیورو)
ضلع کے کوشیشور استھان تھانہ کے ستی گھاٹ۔ راج گھاٹ روڈ پر ہرولی پاور گریڈ کے قریب بدھ کو گھات لگائے شرپسندوں نے ایک نوجوان کو گولی مار کر شدید طور پر زخمی کردیا۔ زخمی نوجوان وکاس کمار عرف سبھاش یادو ولد بلرام یادو پکاہی جھجڑا پنچایت کے ڈوبہا کا رہائشی بتایا گیا ہے۔ لوگوں نے زخمی نوجوان کو علاج کے لئے پی ایچ سی ستی گھاٹ میں داخل کرایا ہے جہاں سے ابتدائی طبی امداد کے بعد ڈاکٹروں نے اسے بہتر علاج کے لئے ڈی ایم سی ایچ بھیج دیا ہے۔ معلومات کے مطابق سبھاش یادو موٹر سائیکل سے اپنے گاؤں ڈوبہا جارہا تھا۔ ادھر ہرولی پاور گریڈ کے قریب مجرموں نے سائلینسر سے لیس پستول سے اسے گولی مار دی اور وہ وہاں سے فرار ہوگیا۔ گولی سبھاش کے بائیں بازو پر لگی اور وہ وہیں پر گر گیا۔ دوسری طرف وہاں سے گزرنے والے راہگیر اسے پی ایچ سی ستی گھاٹ لے گئے۔
اطلاع ملنے پر تھانہ صدر گوتم کمار پولیس فورس کے ہمراہ موقع پر پہنچ گئے اور معاملے کی چھان بین شروع کردی۔ انہوں نے بتایا کہ شرپسندوں کی گرفتاری کے لئے چھاپہ ماری جاری ہے۔ ایس ایچ او مسٹر کمار نے واقعے کی تصدیق کرتے ہوئے کہا کہ واقعے کے پیچھے باہمی دشمنی بتائی جارہی ہے۔ معاملے کی تحقیقات کی جاری ہے۔ دوسری طرف فائرنگ کے اس واقعہ سے علاقے میں خوف و ہراس کا ماحول ہے۔
