کشن گنج (قومی ترجمان) بہار کے وزیر صنعت کی ذمہ داری سنبھالنے کے بعد سید شاہنواز حسین نے پہلی بار کشن گنج کے ٹھاکر گنج-گلگلیہ علاقے کا دورہ کیا جو صنعت کے شعبے میں تیزی سے ترقی کر رہا ہے۔
وزیر صنعت سید شاہنواز حسین نے ٹھاکر گنج-گلگلیہ صنعتی علاقے کا دورہ کرنے کے بعد کہا کہ کشن گنج کو انمول انڈسٹریز کی طرف سے ایک بڑا تحفہ ملا ہے۔ انہوں نے کہا کہ انمول انڈسٹریز کی بسکٹ فیکٹری کا کام ٹھاکر گنج میں 173 کروڑ کی لاگت سے شروع ہوا ہے۔ انہوں نے مزید کہا کہ کشن گنج میں خاص طور پر ٹھاکر گنج گلگلیہ میں صنعتی تناظر میں بے پناہ امکانات ہیں۔
نیپال، بھوٹان، بنگلہ دیش، برما – ایشیا کے بہت سے ممالک کے قریب ہونے کی وجہ سے ٹھاکر گنج گلگلیہ انڈسٹریل علاقہ صنعت کاروں کی نظروں میں ہے اور یہاں بڑی بڑی صنعتیں لگ رہی ہیں۔
انہوں نے کہا کہ 173 کروڑ کی لاگت سے انمول انڈسٹریز کی بسکٹ فیکٹری کی تعمیر سے 700 سے 800 لوگوں کو روزگار ملے گا۔
شاہنواز نے کہا کہ ٹھاکر گنج-گلگلیہ میں مزید کئی کارخانے قائم کیے جا رہے ہیں اور پرانی کمپنیوں کی صلاحیت کو بڑھایا جا رہا ہے۔ انہوں نے کہا کہ بہار کی مکئی سے اسٹارچ بنانے کی پہلی فیکٹری یہاں 108 کروڑ کی سرمایہ کاری سے چل رہی ہے۔ اب انہوں نے 67 کروڑ کی لاگت سے صلاحیت کو بڑھایا ہے۔ دوسرے مرحلے پر چار ماہ سے کام جاری ہے۔
انہوں نے کہا کہ دوسرے مرحلے کی تکمیل کے بعد ان کی صلاحیت 300 ٹن سے بڑھ کر 600 ٹن ہو جائے گی۔ مسٹر شاہنواز نے کہا کہ پورنیہ کمشنری میں صنعت کے شعبے میں کشن گنج تیزی سے ترقی کرنے والا ضلع بن رہا ہے۔
بہار کے وزیر صنعت سید شاہنواز حسین نے کہا کہ کشن گنج میں 23 صنعتی یونٹس کے قیام کے لیے دو ہزار تین سو ستر (2377 کروڑ) کروڑ کی سرمایہ کاری کی تجاویز موصول ہوئی ہیں۔ ان میں سے بہت سی صنعتوں کا قیام شروع ہو چکا ہے اور باقی کو بھی شروع کرنے کی کوشش کی جا رہی ہے۔
انہوں نے کہا کہ جس طرح چمپارن میں ایک میگا ٹیکسٹائل ہب کے لیے تیاریاں جاری ہیں اسی طرح کشن گنج میں ایک چمڑے کا پارک بنایا جائے گا۔ وزیر صنعت نے کہا کہ ہم کشن گنج میں لیدر پارک کے لیے زمین تلاش کر رہے ہیں۔
سید شاہنواز حسین نے یہ بھی کہا کہ کشن گنج سے گہرا تعلق ہے کیونکہ وہ یہاں سے منتخب ہو کر پہلی بار پارلیمنٹ پہنچے تھے ۔ کشن گنج صنعتوں کی ترقی کے لیے بھی بہت اچھا ہے۔ انہوں نے کہا کہ یہاں انناس پراسیسنگ کی صنعتیں لگائی جا سکتی ہیں، چائے اور چمڑے کی صنعتوں کے لیے پوٹینشل موجود ہے اور تمام امکانات کو مدنظر رکھتے ہوئے یہاں تیزی سے کام کیا جا رہا ہے۔
