بہار کے سرکاری اسکولوں میں آن لائن ہوگی تعلیم، گھر بیٹھے اساتذہ کریں گے رہنمائی، محکمہ تعلیم کا حکم
بہار : 17 جنوری (قومی ترجمان) کورونا وبا کے پیش نظر بہار کے محکمہ تعلیم نے اسکول بند رکھنے کا حکم جاری کیا ہے۔حکومت نے کہا ہے کہ بچوں کو آن لائن پڑھایا جائے۔ پرائیویٹ اسکولوں کی جانب سے حکومتی احکامات کے بعد طلباء کے لیے آن لائن تعلیم کا انتظام کیا گیا ہے۔ لیکن سرکاری اسکول بند ہونے کی وجہ سے طلباء کو پڑھائی میں مشکلات کا سامنا ہے۔ بہت سے بچوں کی پڑھائی سے دلچسپی کم ہو رہی ہے۔ ایسے میں حکومت نے بچوں کی تعلیم کے لیے نیا نظام شروع کیا ہے۔
جمعرات کو بہار کے محکمہ تعلیم نے ایک خط جاری کیا ہے۔ محکمہ کے ایڈیشنل چیف سیکریٹری نے بتایا کہ کورونا کی وجہ سے اسکول بند ہیں۔ بچوں کی تعلیم جاری رکھنے کے لیے کارروائی کو یقینی بنانا ہوگا۔ایسے میں ڈی ڈی بہار کی طرف سے چھٹی جماعت سے لے کر بارہویں جماعت تک کے بچوں کے لیے تعلیمی نشریات شروع کی جا رہی ہیں۔ یہ 17 جنوری کو شروع ہوگا۔
موصولہ اطلاعات کے مطابق کلاس 6 سے 8 صبح 9 سے 10 بجے تک، نویں اور دسویں کلاس 10 سے 11 بجے اور گیارہویں اور 12ویں کلاس 11 سے 12 بجے تک نشر کی جائیں گی۔
وہ بچے جن کے پاس ڈیجیٹل ڈیوائس کی سہولت دستیاب ہیں وہ اپنی پڑھائی گھر بیٹھے کلاس 1 سے 12 تک کی کتابوں اور ای مواد کے ذریعے کر سکتے ہیں جو e-LOTS (اساتذہ اور طلباء کی ای لائبریری) پر دستیاب ہے۔ اسکول کے ہیڈ ماسٹر درجہ وار طلباء کا واٹس ایپ گروپ بنا کر زوم میٹنگ / گوگل میٹ / مائیکروسٹ ٹیم / فیس بک پیج / یوٹیوب کے ذریعے طلباء کی ان کی پڑھائی میں مدد کرسکتے ہیں۔
جن طلباء کے پاس ڈیجیٹل ڈیوائس کی سہولت نہیں ہے ان کے اسکول کے ہیڈ ماسٹر اپنے اساتذہ کے ذریعے بچوں کے گھر جا کر رہنمائی کریں گے۔
خط میں کہا گیا ہے کہ حکومت بچوں کی تعلیم جاری رکھنے کے لیے کوششیں کر رہی ہے تاکہ تمام طلبہ مستفید ہو سکیں۔
